الثلاثاء، 15 مارس 2011

هام لكل المصريين الاستفتاء على التعديلات الدستوريه المواد اللي اتعدلت الراى والراى الاخر في التعديلات

السلام عليكم ورحمة الله وبركاته

المصريين الاستفتاء التعديلات الدستوريه المواد

الموضوع دا طبعا من اسمه باين انه غايه في الاهميه لانه بيتكلم عن مستقبل بلدنا اللي احنا دلوقتي شغالين بايدنا وسنانا عشان نتقدم بيها للامام

وهعرض ان شاء الله معاكم دلوقتي المواد اللي تم تعديلها وهعرض وجهة نظر الراى المؤيد لكل ماده والراى المعارض لها

نبدا بسم الله الرحمن الرحيم

الماده 75
1 - يكون مصري وابوه وامه مصريين
2 - عمره لا يقل عن 40 سنه
3 - الا يحمل جنسيه اخرى غير المصريه
4 - ابوه وامه مصريين ولا يحملوا اى جنسيه اخرى
5 - زوجته تكون مصريه ولا تحمل اى جنسيه اخرى
اقتباس:
الراى المعارض لهذه الماده
بيقولوا ان الدستور في الماده دي فصل حق ترشيح للرئاسه للبعض عشان يمسكوا الحكم وانه في ناس تانيه عندهم مميزات كتيره ممكن تخلي بلدنا احسن
اقتباس:
الراى المؤيد
بيقولوا ان الماده دي مناسبه جدا عشان عاوزين الرئيس اللي يحكمنا بكون مصري بنسبة 100% ميكونش متخلط باى عرق اجنبي

الماده 76

1 - يلزم لقبول الترشيح لرئاسة الجمهورية أن يؤيد المتقدم 30 عضوًا على الأقل من الأعضاء المنتخبين لمجلسي الشعب أو الشورى، أو أن يحصل المرشح على تأييد ما لا يقل عن 30 الف مواطن ممن لهم حق الانتخاب في 15 محافظة على الأقل، بحيث لا يقل عدد المؤيدين في أي من تلك المحافظات عن 1000 مؤيد

2 - لكل حزب من الأحزاب السياسية التي حصل أعضاؤها على مقعد على الأقل بطريق الانتخاب في أي من مجلسي الشعب والشورى في آخر انتخابات حق الترشيح لانتخابات الرئاسه

3 - وتتولى لجنة قضائية عليا تسمى «لجنة الانتخابات الرئاسية» الإشراف على انتخابات رئيس الجمهورية بدءًا من الإعلان عن فتح باب الترشيح وحتى إعلان نتيجة الانتخاب.
وتُشكل اللجنة من رئيس المحكمة الدستورية العليا رئيسًا، وعضوية كل من رئيس محكمة استئناف القاهرة وأقدم نواب رئيس المحكمة الدستورية العليا وأقدم نواب ريس محكمة النقض وأقدم نواب رئيس مجلس الدولة. " بمعنى ابسط الاشراف القضائي الكااامل على الانتخابات " وبتكون القرارات اللي بتاخدها اللجنه نهائيه مينفعش عليها طعن

اقتباس:
اولا الجزء رقم 3 في هذه الماده لا يختلف عليه اثنان والكل متفق عليه وهو الاشراف القضائي الكامل ع الانتخابات ودي احد ابرز التعديلات
اقتباس:
الراى المعارض لهذه الماده
وجهة نظرهم في جزء ال 30 الف مؤيد من 15 محافظه مختلفه وبيعتبروا ان دا شرط تعسفي وصعب تحقيقه
وبالنسبه لجزء ان الحزب اللي له مقعد واحد ع الاقل في مجلس الشعب له الحق في ترشيح نفسه للرئاسه على اى اساس وهو مش حزب اغلبيه وملوش اى حس في البلد؟؟
اقتباس:
الراى الؤيد لها
وجهة نظرهم ان جزء ال 30 الف مواطن مؤيد انه هيبقى رئيس جمهوريه دوله كامله عباره عن 30 محافظه يعني لازم يكون واحد له شعبيه جماهيريه كبيره وان ال 30 الف دول لا يتعدوا الــ 1% من تعداد سكان مصر اكثر من 80 مليون

اما جزء الحزب اللي له كرسي واحد ع الاقل فدا لان الحزب بيكون له اهداف سياسيه واضحة المعالم للجميع واكيد هو هيمشي على سياسة الحزب دا

الماده 77
الماده دي خاصه بمدة الرئاسه
مدة الرئاسة أربع سنوات ميلادية تبدأ من تاريخ إعلان نتيجة الانتخاب. ولا يجوز إعادة انتخاب رئيس الجمهورية إلا لمدة واحدة تانية.
يعني بمعنى ابسط ان فترة الرئاسه 4 سنوات وله الحق ف ترشيح نفسه مره كمان وبسسسسس

اقتباس:
والماده دي مفيش عليها اختلاف الكل مؤيد ليها

الماده 93
دي بتتكلم عن الطعن على اعضاء مجلس الشعب هل ناجح بزوير او لا؟

بتقول ان رئيس المجلس بيحول الطعن لمحكمة النقض واللي بتظهر النتيجه خلال 60 يوم وبعد متظهر النتيجه تتعرض على المجلس ولازم يوافق عليها ثلثين اعضاء مجلس الشعب

بعد التعديل :- تصبح المسئول عن الطعون المحكمه الدستوريه فقط
اقتباس:
وطبعا دي نقطه كويسه في نظر الجميع مفيش فيها اختلاف

الماده 139
واللي بتتكلم عن تعيين نائب رئيس للجمهوريه
بتقول ان الرئيس لازم يعين نائب له بعد 60 يوم من توليه الحكم ولو حب يعفيه عن منصبه يعين واحد بديل له وطبعا شروط اختيار نائب الرئيس هى هى نفس شروط اختيار نائب الرئيس " مصري 100%"
اقتباس:
الراى المعارض لهذه الماده
انه الرئيس بيعين نائب الرئيس والمطلوب يكون بالانتخاب وليس بالتعيين

الماده 148
اللي بتخص اعلان حالة الطوارئ
1 - يتم العرض على مجلس الشعب بعد 7 ايام فقط من الوقت اللي اعلتو فيه حالو الطوارئ
2 - لو كان في وقت مخالف لوقت انعقاد جلسة مجلس الشعب تتعمل جلسه في خلال 7 ايام
3 - لازم موافقه من اعضاء مجلس الشعب بالاغلبيه
4 - له مده محدوده ومينفعش يمدوه الا بموافقة مجلس الشعب واقصى مده لفرضه 6 شهور
اقتباس:
الراى المعارض
وجهة نظرهم انهم بيطلبوا ان فرض قانون الطوارئ يكون في جزء محدد مش البلد كلها

الماده 179
والخاصه بالارهاب تم الغائها بالكامل
والكل متفق عليها

الماده 189
واللي بتتكلم عن ازاى نعدل ع الدستور وتم اضافة مادتين

إضافة المادة 189 مكررًا
يجتمع الأعضاء غير المعينين لأول مجلسي شعب وشورى تاليين لإعلان نتيجة الاستفتاء على تعديل الدستور لاختيار الجمعية التأسيسية المنوط بها إعداد مشروع الدستور الجديد خلال ستة أشهر من انتخابهم، وذلك كله وفقًا لأحكام الفقرة الأخيرة من المادة 189.


إضافة المادة 189 مكررًا 1
يمارس أول مجلس شورى، بعد إعلان نتيجة الاستفتاء على تعديل الدستور، بأعضائه المنتخبين اختصاصاته.
ويتولى رئيس الجمهورية، فور انتخابه، استكمال تشكيل المجلس بتعيين ثلث أعضائه، ويكون تعيين هؤلاء لاسكمال المدة الباقية للمجلس على النحو المبين بالقانون

وطبعا دا عشان المرحله الانتقاليه اللي احنا فيها نظرا ان مفيش مجلسي الشعب والشورى

وفي ناس بقى معارضه لفكرة تعديل مواد معينه من الدستور مطالبين بتعديل الدستور بالكامل لانه كدا اصبح زى العبايه المرقعه ولكل وجهة نظره نحترمها

وبكدا انا عرضت للجميع كل التعديلات وكل الآراء المؤيد والمعارض ووجهة نظر كل منهم وعليك انت قراءة ما سبق بتركيز ولو شايف ان دا في مصلحة بلدنا هتدلي بصوتك ف الاستفتاء بنعم ولو ان دي غير كافيه يبقى هتدلي بصوتك وتقول لا

اهم حاجه ان كلنا ان شاء الله يوم السبت القادم هنروح لاقرب لجنه انتخابيه ونشارك في الاستفتاء سواء مؤيدين او معارضين بما يتناسب مع مصلحة مصر

ولو اى حد محتاج اى استفسار انا موجود معاكم متابع

ليست هناك تعليقات:

إرسال تعليق